السيره الجزء التاني

بسم الله الرحمن الرحيم
الحمد لله والصلاة والسلام على رسول الله
اما بعد
اتكلمنا في المرة اللي فاتت عن اهمية القدوة وضرورة التركيز كتير جدا في اجابة السؤال ده لان ببساطة اللي انت عامله قدوتك هيكون قائد ليك يوم القيامة
واتفقنا ان لا يوجد انسان في الكون نتمنى اننا نكون معاه وبقربه يوم القيامة اكتر من سيدنا محمد
وسؤال النهارده ليه قدوتنا تكون سيدنا محمد صلى الله عليه وسلم
والحقيقة السؤال ده سهل جدا وصعب جدا
سهل لان فعلا لا يوجد أي حد في الدنيا الا وفيه نقص معين فانت ممكن تقتدي بيه في موقف ومتقتديش بيه في موقف تاني الا الشخصية العظيمة دي
وصعب جدا لان اكبر صعوبة تواجهك انك لما تتكلم عن جوانب العظمة في شخصية سيدنا محمد صلى الله عليه وسلم والله هتتعب جدا ومش هتعرف تبدا منين ولا تقول ايه
عادة أي عظيم من العظماء ممكن تظهر عظمته في موضوع او في جانب معين من جوانب الحياة
نيوتن كان بارع في الفيزياء بس هل كان قاد عسكرى ؟ هل كان شخصية اجتماعية مؤثرة في الناس ؟ هل كان له فكر معين ورثه لغيره وربى جيل عليه وحملوا الراية من بعده ؟ هل كان ناجح في علاقتة الاسرية والعائلية ؟ هل كان اب ناجح وزوج ناجح ؟
ونفس المثال ينطبق على ارسطو وفيثاغورث واينشتاين ونابليون وغيرهم
انما كانت اكبر عظمة في شخصية سيدنا محمد هي تكامل جوانب عظمته في كل النواحي
رجل نجح في كل الميادين
في كل شئ عمله نجح فيه
وعشان كده لما يقابلك أي موقف في حياتك واحترت تاخد قرار ايه في الموقف ده
سبحان الله هتلاقي في سيرة سيدنا محمد موقف مشابه له واخد فيه قرار
وهتتعجب ازاي عاش كل ده وعاش كل التجارب اللي زي دي
عشان كل مسلم من بعده لما يعيش تجربة وعاوز ينجح فيها لازم يبص دايما على تجربة سيدنا محمد صلى الله عليه وسلم
ولو حبينا نقول باختصار لان ده هيكون موضوع طوييييييييييييييييل بيننا ان شاء الله
طفل صغير اتولد في بيئة صحراوية بيئة بعيدة تماما عن العلم
اتولد لقا نفسه يتيم الاب وبعد ست سنين ماتت الام كمان وبعد سنتين مات الجد اللي كان بيعطف عليه في بيئة قاسية جدا
كان ايه اللي متصور من انسان زي ده بظروفه دي
كان ممكن يطلع ناقم على الدنيا كلها كئيب متشائم يعاني من الفشل في كل اموره مدمر لنفسه ولمجتمعه
يعيش مع عمه في فقر شديد وعمه كان عنده ولاد كتير ومال قليل فقرر انه ميكونش عالة على عمه ونزل يشتغل في سن مبكرة جدا وهوا مكملش عشر سنين
تصوروا كده كان ممكن يكون ايه بعد الفقر الشديد ده والمعاناة في الطفولة دي
كان ممكن يكون جشع للمال عايز يجمعه باي شكل وباي تمن ومن أي طريق المهم يكون من اغنى الاغنياء ويخلى الناس اللى ادامه دول عبيد عنده مش كده؟
بعد كده اشتغل في مال واحدة ست ارملة من اكابر اهل بلده
اظن أي حد في مكانه وباللي جراله في عمره كان ممكن يعمل ايه
واظن دي مش محتاجة توضيح
طلع بره بلده واشتغل وانتو عارفين ان اخلاق بعض الناس بتتغير حسب المكان فممكن وانت في بلدك ووسط اهلك تكون مضطر لتصرفات معينة واخلاق معينة ولما تسافر او تروح أي مكان تاني تلاقي الاخلاق اتغيرت واتبدلت وظهرت الحقايق واسألوا تايلاند وجزر هاواي

عاش شبابه في بلد مفيهاش عيب ولا حرام اللي نفسه في حاجة بيعملها
خمرة موجودة ليل نهار وبيوت مشبوهة والعجيب انها برضه مش عيب وكانوا بيحطوا عليها راية حمرا عشان تتعرف بينهم ان البيت ده من البيوت المشبوهة
واظن شاب زيه مش معاه امكانيات للجواز ولا باين ان فيه امل حتى في الجواز من الفقر الشديد وانه يتيم الابوين اظن كان مكانه الطبيعي البيوت دي ويشرب عشان ينسى
مش بقولكم الواحد لو حب يتكلم عن عظمة شخصيته يتكلم عن ايه ويسيب ايه
اتجوز المراة الغنية وكانت اكبر منه واظن كل الناس ممكن تقول عن شاب يتجوز ست غنية وكبيرة وارملة مرتين وعندها اولاد من اجوازها الاتنين يعيش معاها اد ايه ويخلص لها اد ايه وميعرفش عليها ست تانية لا جواز ولا غير جواز
تخيلوا انه يقعد معاها 25 سنة ميعرفش غيرها 25 سنة كان وصل عمره فيها للخمسين
ومتجوزش عليها ولا عرف واحدة غيرها وهيا اصلا عمرها يوم متجوزها كان 40 سنة ووصلت بعد ال 25 سنة دول لسن 65 سنة
واظن انتوا فاهمين اللي ممكن يعمله زوج شاب لزوجة غنية اكبر منه وازاي يبرر لنفسه أي تصرف
ازاي بيشوف فترة شبابه وزهرة عمره بتضيع مع الست الكبيرة دي
ده عاش معاها 25 سنة وماتت وهوا في الخمسين بعد الشباب ماراح
سبحان الله
ما اعظمها من شخصية
مش قلتلكم جوانب العظمة كتير جدا
ونكمل في اللقاء القادم باذن الله
والسلام عليكم ورحمة الله وبركاته